संसदीय छानबिन समितिको कार्यादेशमा दलहरु सहमति नजिक, भोलि शीर्ष नेताबीच छलफल हुने
समयबद्ध सम्वाददाता
2024 May 25
सहकारीको रकम अपचलनबारे छानबिन गर्ने संसदीय समितिको कार्यादेशमा सत्तारुढ र प्रमुख प्रतिपक्षी दल नेपाली कांग्रेस सहमति नजिक पुगेका छन् ।
कार्यादेश (टीओआर) टुंगो लगाउन गठित कार्यदलको बैठकले कार्यादेशमा करिब सहमति जुटाएर यसलाई अन्तिम रुप दिने जिम्मा शीर्ष नेतालाई दिएको छ । तर शनिबार नै बस्ने भनिएको शीर्ष नेताको बैठक भने कांग्रेस सभापति शेरबहादुर देउवा अस्वस्थ भएकाले बस्न सकेन ।
कार्यदल सदस्यसमेत रहेका राष्ट्रिय स्वतन्त्र पार्टीका सांसद शिशिर खनालका अनुसार शीर्ष नेताको बैठक आइतबार बिहान ९ बजे बस्नेछ । सरकारको नीति तथा कार्यक्रम पारित गर्नका लागि आइतबार नै दिउँसो ११ बजे प्रतिनिधि सभा बैठक बोलाइएको छ । तर त्यसअघि नै दलहरुबीच सहमति भएर संसद खुल्ने वा नखुल्ने भन्ने टुंगो लागेको छैन ।
कार्यादेशमाथि छलफल गर्न गठित कार्यादलका संयोजक कानुन, न्याय तथा संसदीय मामिलामन्त्री पदम गिरीका अनुसार संसदमा र सार्वजनिक सञ्चार माध्यममा प्रश्न उठेका सहकारी र उक्त सहकारीको वचत रकम नियम विपरीत लगेर अपचलन गर्ने सञ्चार माध्यमको नाम संसदीय समितिको कार्यादेशमा राख्ने सहमति जुटेको छ ।
‘आज हामी कहाँसम्म पुगेर सअमति बनिसकेको अवस्था हो भने जुन जुन सहकारीबाट रकम लगिएको छ वा अपचलन भएको छ, नियम विपरीत रकम गएको छ र जुन जुन कम्पनीले लिएको छ भनिएको छ, सार्वजनिक मिडियामा आएका छन् र संसदमा विषय उठेका छन्, ती कम्पनीको नाम पनि उल्लेख गर्ने ती सहकारी, संस्थाहरुको नाम पनि उल्लेख गरौं, त्यसलाई केन्द्रविन्दुमा राखेर छानबिन गर्ने गरी समिति बनाउन सकिन्छ भन्ने ठाउँमा उभिएको पाउँछु म’ उनले भने ।
यो भनेको कार्यादेशमा गोर्खा मिडिया प्रालिको नाम राख्ने हो भन्ने पत्रकारको प्रश्नमा उनले भने, ‘हो, त्यो हदसम्म, यदि समस्याको समाधान हुन्छ, संसदको डेडलक खुल्छ भने त्यो पनि राखेर जाने सहमति भएको पाइयो बैठकमा ।’
बैठकमा सहभागी नेताहरुका अनुसार नेपाली कांग्रेसले भने वचत रकम लैजाने कम्पनी गोर्खा मिडियाका तत्कालिन प्रबन्ध निर्देशक रवि लामिछानेमाथि छानबिन गर्ने विषय कार्यादेशमा राख्नुपर्ने अडान राखेको छ । तर सत्तारुढ दलका नेताहरुले भने कम्पनीमाथि छानबिन भएपछि त्यसमा दोषीको पहिचान हुने भन्दै पहिले नै नाम तोक्न नमिल्ने बताएका छन् ।
पोखराको सूर्यदर्शन सहकारी, बुटवलको सुप्रिम सहकारी, चितवनको सहारा लगायत सहकारीको रकम गोर्खा मिडिया प्रालिले गैरकानुनी रुपमा लगेर अपचलन गर्दा वचतकर्ताले वचत फिर्ता नपाएको समाचारहरु सार्वजनिक भएका छन् र नेपाली कांग्रेसले पनि संसदमा यो विषय उठाएको थियो ।
कांग्रेसले ती सहकारीको रकम अपचलन हुँदा गोर्खा मिडिया प्रालिमा हालका गृहमन्त्री रवि लामिछाने प्रबन्ध निर्देशक रहेको भन्दै उनीमाथि छानबिन गर्न माग गर्दै आएको छ ।
क्याटेगोरी : समाचार
धेरै पढिएका
प्रतिक्रिया