पत्रकार महासङ्घको अध्यक्षमा निर्मला शर्माको जीत निश्चित, इतिहासमै पहिलो पटक महिला नेतृत्व
काठमाडौं । नेपाल पत्रकार महासंघको इतिहासमा पहिलो पटक महिला नेतृत्व हुने भएको छ । शुक्रबार सम्पन्न निर्वाचनबाट अध्यक्षमा निर्मला शर्मा विजयी हुने निश्चित भएसँगै महासंघले पहिलो पटक महिला नेतृत्व पाउने भएको हो । उनले निकटम प्रतिद्वन्द्वी रमेश विष्टलाई पराजित गर्दै महासंघको नेतृत्व गर्ने निश्चित भएको हो ।
केन्द्रीय निर्वाचन समितिका अनुसार निर्वाचनको मतपरिणामको अन्तिम नतिजा भने आइतबारमात्रै सार्वजनिक गरिनेछ । समितिका अनुसार केही स्थानमा अझै केही मत गन्न बाँकी भएपनि निर्मलाको गन्न बाँकी भन्दा बढी मतान्तर भइसकेको छ । सबै मत गणना शनिबार रातिसम्म सकिने र प्रक्रिया पूरा गरेर निर्वाचित भएको घोषणा गरिने समितिका एक सदस्यले बताए ।
उनका अनुसार पदाधिकारीमा वरिष्ठ उपाध्यक्षमा दीपक आचार्य, उपाध्यक्षमा नितु पण्डित, महासचिवमा रामप्रसाद दाहाल लगायत निर्वाचित हुने निश्चित भइससकेको छ । यस्तै अधिकांश केन्द्रीय सदस्य पदमा सत्ता गठबन्धन निकटका उम्मेदवार विजयी हुने निश्चित भएपनि केही पदमा भने प्रेस सेन्टर निकटका उम्मेदवार निर्वाचित भएका छन् ।
निर्वाचनमा कांग्रेस एमाले निकट क्रमशः प्रेस युनियन र प्रेस चौतारीको गठबन्धन थियो भने प्रेस सेन्टरसहितका केही पत्रकार संगठनले पनि तालमेल बनाएर निर्वाचनमा भाग लिएका थिए । यसरी तालमेल हुँदा प्रेस युनियनबाट अध्यक्षमा बागी उम्मेदवारी दिएका विष्टलाई प्रेस सेन्टर नेतृत्वलगायतले साथ दिएका थिए ।
क्याटेगोरी : समाचार
थप समाचार
धेरै पढिएका
प्रतिक्रिया