माओवादी केन्द्र बागमती प्रदेशमा वास्तविक र औपचारिक नेतृत्व
विशेष सम्वाददाता
2025 January 16
काठमाडौं । नेपाल कम्युनिस्ट पार्टी (माओवादी केन्द्र) को बागमती प्रदेश कार्यालय बबरमहलमा अवस्थित छ । यद्यपि, कार्यालय व्यवस्थापनका लागि केही कर्मचारी तैनाथ गरिए पनि औपचारिक गतिविधि न्यून रहेको देखिन्छ । बागमती प्रदेशका इञ्चार्ज अग्नि सापकोटा र प्रदेश अध्यक्ष सरल सहयात्री औपचारिक बैठकबाहेक कार्यालयमा कमै देखिने गरेको जनाइएको छ ।
सिन्धुपाल्चोकबाट प्रदेश सभामा निर्वाचित सरल सहयात्री प्रायः प्रदेश राजधानी हेटौंडा र आफ्नो जिल्लामा व्यस्त रहने गरेका छन् । कार्यालयमा उनको उपस्थिति न्यून रहेको र सामाजिक सञ्जालमा सक्रिय समय बित्ने गरेको उल्लेख गर्दै नेतृत्व र व्यवस्थापनमा कमजोरी देखिएको भनी टिप्पणी हुने गरेको छ ।
यता, बबरमहलबाट केही दूरीमा रहेको सिंहदरबारस्थित राष्ट्रियसभाका अध्यक्ष नारायण दाहालको अफिसले भने बागमती प्रदेशको राजनीतिमा ठोस प्रभाव पारिरहेको छ । माओवादी केन्द्रका बागमती प्रदेशका पूर्वअध्यक्षसमेत रहेका नारायण दाहालले स्रोतसाधन र गुटबन्दीलाई प्रभावकारी रूपमा प्रयोग गरिरहेका छन् ।
माओवादी केन्द्रका अध्यक्ष पुष्पकमल दाहाल ‘प्रचण्ड’का भाइको रूपमा आफूलाई चिनाउन मन पराउने नारायण दाहालले पार्टीभित्र संरक्षण राजनीति हावी गराउँदै आएको देखिन्छ । यद्यपि औपचारिक रूपमा अग्नि सापकोटा र सरल सहयात्री नेतृत्वमा रहेका छन्, नारायण दाहालको राजनीतिक प्रभावले बागमती प्रदेशमा धेरै कुरा निर्देशित गरेको आरोप छ ।
संविधान अनुसार राष्ट्रियसभाका अध्यक्षले राजनीतिक गतिविधिमा प्रत्यक्ष रूपमा सहभागी हुन नपाउने व्यवस्था भए पनि नारायण दाहालले पार्टीभित्र गुटबन्दीमा सक्रिय सहभागिता जनाउँदै आएको आरोप लगाइएको छ । दाहालले आर्थिक रूपमा विवादित व्यक्तिहरूलाई समर्थन र संरक्षण गर्दै आफ्नो गुटलाई सुदृढ बनाएको भन्दै विभिन्न तहबाट आलोचना भइरहेको छ ।
बागमती प्रदेशमा नारायण दाहालको गुटले प्रभावशाली भूमिका खेल्दै आएको छ । उनले आफ्नो सचिवालयको प्रयोग गर्दै बागमती प्रदेशमा मात्र होइन देशव्यापी रूपमा पनि गुटबन्दीलाई संस्थागत गर्दै गएको आरोप लाग्दै आएको छ ।
माओवादी केन्द्रको बागमती प्रदेश कार्यालय व्यवस्थापन र गुटबन्दीका विवादहरूले पार्टीभित्र आन्तरिक समस्या चर्काउने खतरा देखिएको छ । यदि नेतृत्वले यी समस्याहरू समाधान गर्न तत्काल ठोस कदम चाल्न सकेन भने यसले पार्टीको साख र एकतालाई गम्भीर नोक्सानी पुर्याउन सक्छ ।
बागमती प्रदेशको नेतृत्वलाई व्यवस्थित गर्दै गुटबन्दीमाथि कडाइका साथ रोक लगाउनु अनिवार्य भएको छ । नारायण दाहालको भूमिकामा लगाम लगाउने या अग्नि सापकोटालाई इञ्चार्ज बदलेर नयाँ नेतृत्वको खोजी गर्ने उपायको बारेमा नेतृत्वले छिट्टै निर्णय लिनुपर्ने देखिन्छ ।
क्याटेगोरी : राजनीति
थप समाचार
धेरै पढिएका
प्रतिक्रिया