बागमती प्रदेश कार्यालयमा पार्टी अनुशासन समितिका प्रमुखको रूपमा रहेका ईश्वरीप्रसाद भट्टराई कार्यसम्पादनमा उदासीन देखिएका छन् । प्रदेश कार्यालयमा उजुरीको चाङ भए पनि उनले कुनै पनि मुद्दाको टुंगो लगाउन सकेका छैनन् । स्रोतका अनुसार, जब कुनै गम्भीर उजुरी पर्छ, त्यसलाई प्रभावमा पार्न केही पदाधिकारीलाई विदेश भ्रमणको अवसर समेत मिल्ने गरेको छ ।
काभ्रेको नयाँ उजुरी
माओवादी बागमती प्रदेश कमिटी सदस्य तिलक बहादुर लामाले बेलायतमा बसोबास गर्ने साझेदार नवीन कुमार स्याङ्तान र मिरा तामाङलाई ठगेको आरोप लागेको छ । ठमेलमा सञ्चालन गरिएको ‘राइम लउञ्ज एण्ड बार’ नामक रेष्टुरेन्टका सम्पूर्ण भौतिक सम्पत्ति बेचेर लामा फरार भएका छन् । पीडित साझेदारहरूले माओवादी पार्टीका बागमतीका इन्चार्ज र अध्यक्षलाई सम्बोधन गर्दै न्याय दिलाइदिन माग गरेका छन् । करिब एक करोड लगानी रहेको सो व्यवसायमा स्याङ्तान र तामाङको मात्रै ३० लाख लगानी रहेको बताइएको छ । ठगीपछि सम्पर्कविहीन भएका लामाको खोजी र न्यायका लागि पीडित पक्षले कानुनी प्रक्रिया अघि बढाउने जनाएका छन् ।
यो पनि पढ्नुहोस, माओवादी नेता तिलक लामाद्वारा व्यावसायिक साझेदार ठगी, साझेदारद्वारा न्याय माग
यसबारेमा बागमती प्रदेशका अनुशासन समितिका प्रमुख ईश्वरी भट्टराईले काभ्रे जिल्ला संयोजक भोला अर्यालले यसबारेमा छलफल गर्ने बताएकाले काम अगाडि नबढाएको जानकारी दिए । उनले यसो भने पनि झारो टार्ने काम गरेको अर्थमा धेरैले बुझेका छन् ।
सिन्धुलीमा गम्भीर उजुरीको उपेक्षा
सिन्धुलीको हरिहरपुरगढीका अध्यक्ष बज्रध्वज वाइबाविरुद्ध विदेशमा रोजगारीमा रहेका भुइँमान्छेले गम्भीर उजुरी दिएका थिए । तर, सो उजुरी सुनुवाइमा आउन सकेन । वाइबाले बागमती प्रदेशका पूर्व तथा वर्तमान पदाधिकारीहरूलाई प्रभावमा पारेर उजुरीलाई रोक्ने प्रयास गरेको आरोप लागेको छ । उनले कतिपय नेतालाई विदेश भ्रमण नै गराएको चर्चा छ ।
मरिण र गोलञ्जोरमा पनि मिलेमतोको चर्चा
मरिण र गोलञ्जोरबाट परेका उजुरीहरूमा समेत प्रदेशका नेताहरूको मिलेमतो भएको चर्चा छ । उजुरीहरू एकीकृत प्याकेजअन्तर्गत सामूहिक रूपमा दफन गरिने गरेको सचिवालयका एक सदस्यले बताए ।
सरोकारवाला नेतृत्वको भूमिका अस्पष्ट
बागमती प्रदेशका वर्तमान अध्यक्ष सरल सहयात्री र पूर्व अध्यक्ष नारायण दाहाल निकट व्यक्तिहरूले संगठनमा निर्णायक भूमिका खेल्ने गरेको बताइन्छ । दाहालकै निर्देशनमा हरिहरपुरगढीमा बागमती प्रदेशको प्रेस सेन्टरको बैठक राखिएको चर्चा चलेको छ ।
अनुशासन समितिका अध्यक्षको निष्क्रियता
सिन्धुली मात्रै नभई काभ्रेलगायतका विभिन्न उजुरीमा पनि अनुशासन समितिका अध्यक्ष भट्टराईले कुनै निर्णय लिएका छैनन् । काभ्रेमा व्यवसायी विवादका बारेमा दिएको उजुरी सार्वजनिक भएको छ ।
यो अवस्थाले बागमती प्रदेशमा पार्टी अनुशासनको अस्तित्वमाथि नै प्रश्न उठाएको छ । उजुरी दर्ता हुने तर सुनुवाइ नहुने स्थिति कायमै रहेमा पार्टीमा अनुशासन र नीतिगत प्रक्रियाहरू औपचारिकतामा सीमित हुने देखिन्छ ।
क्याटेगोरी : समाचार
थप समाचार
धेरै पढिएका
प्रतिक्रिया