चन्द्रपुर, २२ चैत । रौतहट उद्योग वाणिज्य संघमा तालाबन्दी भएको छ । संघको वर्तमान कार्य समितिको कार्यशैली प्रति असन्तुष्ट बनेका व्यवसायीहरुको समूहले मुख्य प्रवेशद्वारमा ताला लगाएका हुन् ।
असन्तुष्ट व्यवसायीहरुको तर्फबाट राकेशकुमार झा, विकास विक्रम साह, कौशल साहलगायतका व्यापारीहरुले शुक्रबार संघको कार्यालयको मुल गेटमा ताला लगाएका हुन् । आम उद्योगी, व्यवसायीहरुको हकहित, सामाजिक दायित्व निर्वाह तथा संरक्षणको लागि मर्यादित संस्थालाई कार्य समिति अध्यक्ष तथा महासचिवले नीजि स्वार्थका कारण गैरकानुनी ढङ्गले बन्धक बनाउन खोजेका कारण बाध्य भएर तालाबन्दी गर्नुपरेको गौर वडा नम्बर १ का व्यापारी कौशल साहले बताए।
विशेष साधारणसभा तथा अधिवेशन तोकिएपछि विधान विपरित नयाँ सदस्यता दर्ता गराइएकाले विधान अनुरुप निकास निकाल्न व्यापारीहरुको साझा माग रहेको व्यापारी विकास विक्रम साहले बताए।
उद्योग वाणिज्य संघ रौतहटको विशेष साधारणसभा तथा अधिवेशनका लागि भोलि ९शनिबार०का दिन समय तोकिएको थियो ।
चैत २३ गते तोकिएको विशेष साधारणसभा तथा अधिवेशन अध्यक्ष पण्डितप्रसाद जयसवालले स्थगित भएको सूचना प्रकाशन गरेलगत्तै महासचिव रबिन्द्रनाथ गोपालीले तोकिएकै समयमा हुने सूचना जारी गरेका थिए ।
उद्योग वाणिज्य संघ रौतहटको वर्तमान कार्यसमितिको पदावधी यहि चैत २६ गतेसम्म मात्र रहेकाले समयमै सक्षम नेतृत्व आउनुपर्ने र त्यसका लागि साधारणसभा तथा अधिवेशन तोकिएको समयमै हुनुपर्ने संघका महासचिव गोपालिको माग रहेको छ ।
क्याटेगोरी : अर्थ, समाचार
थप समाचार
धेरै पढिएका
प्रतिक्रिया