काठमाडौं – सन् २०२२ मा विश्वभर ३० लाखभन्दा बढी बालबालिकाको मृत्यु एन्टिबायोटिक प्रतिरोधी सङ्क्रमणका कारण भएको एक नयाँ अध्ययनले देखाएको छ । बाल स्वास्थ्यका दुई प्रमुख विज्ञहरूले विश्व स्वास्थ्य सङ्गठन (डब्लुएचओ) र विश्व बैंकसहित विभिन्न स्रोतबाट सङ्कलन गरिएका तथ्याङ्कहरूको विश्लेषण गर्दै यस्तो गम्भीर निष्कर्ष निकालेका हुन् ।
बीबीसीले उल्लेख गरेअनुसार, अफ्रिका र दक्षिण पूर्वी एशियाका बालबालिका यस समस्याबाट सबैभन्दा बढी प्रभावित छन् । अध्ययन अनुसार, एन्टिबायोटिक औषधिले असर नगर्ने अवस्थामा पुग्ने सङ्क्रमणलाई ‘एन्टिमाइक्रोबियल रेसिस्टेन्स’ (एएमआर) भनिन्छ, जसलाई अहिलेको सबैभन्दा ठूलो सार्वजनिक स्वास्थ्य चुनौतीको रूपमा लिइएको छ ।
एएमआरको कारण साधारण छालाको सङ्क्रमणदेखि लिएर निमोनिया, रक्तस्राव र आन्द्राको इन्फेक्सनजस्ता जीवघातक ब्याक्टेरियल रोगहरूमा प्रयोग हुने औषधाहरू पनि प्रभावहीन बन्न थालेका छन् । प्रतिवेदनमा उल्लेख छ कि सन् २०२१ देखि २०२४ को तीन वर्षको अवधिमा एएमआरसम्बन्धी सङ्क्रमण १० गुणाले बढेको छ ।
विशेषज्ञहरूले यस समस्याको समाधानका लागि एन्टिबायोटिकको अत्यधिक प्रयोगमा नियन्त्रण गर्नुका साथै खोप अभियानलाई तीव्र बनाउन, सरसफाइमा सुधार ल्याउन र पोषण अभाव हटाउनुपर्ने सुझाव दिएका छन् । यस्ता उपायहरू अपनाउन नसके भविष्यमा यो समस्या अझ भयावह हुने चेतावनी पनि दिइएको छ ।
एन्टिबायोटिक औषधिको अन्धाधुन्ध प्रयोग, बिना परीक्षण औषधि सेवन गर्ने प्रवृत्ति तथा अस्पतालहरूमा संक्रमण नियन्त्रणको अभावले एएमआरको जोखिमलाई बढाएको विज्ञहरू बताउँछन् । यो समस्याले धनी तथा गरिब सबै मुलुकलाई असर गरिरहेको भए पनि कम आय भएका मुलुकमा यसको प्रभाव अझ विनाशकारी भइरहेको छ ।
यसैबीच, जनस्वास्थ्य विशेषज्ञहरूले नेपाल लगायतका विकासोन्मुख मुलुकहरूमा पनि एएमआरसम्बन्धी चेतना अभिवृद्धि गर्नुपर्ने आवश्यकता औंल्याएका छन् । सरकार, स्वास्थ्य संस्था र आमनागरिक सबैले सधैं सावधानी अपनाउनु जरुरी छ ताकि सामान्य सङ्क्रमणले पनि भविष्यमा ज्यान लिने खतरा नबनोस् ।
क्याटेगोरी : स्वास्थ्य
थप समाचार
धेरै पढिएका
प्रतिक्रिया