शेयर बजारमा निरन्तर उच्च अंकले वृद्धि
समयबद्ध सम्वाददाता
2024 May 22
शेयर बजार बढ्ने क्रम बुधबार पनि निरन्तरता पाएको छ । साताको पहिलो दिनदेखि निरन्तर उच्च अंकको वृद्धि हुँदै आएको शेयर बजार मापन गर्ने नेप्से परिसूचकमा बुधबार पनि १५ दशमलव पाँच चार अंकको वृद्धि देखिएको हो ।
बुधबार नेप्से परिसूचक अघिल्लो दिनको तुलनामा शून्य दशमलव सात तीन प्रतिशतले बढेर २१ सय ३१ दशमलव चार नौ अंकमा उक्लिएको छ । यो साताको चार कारोबार दिनमा मात्रै नेप्से परिसूचकमा १ सय १२ दशमलव सात एक अंकको बढेको छ । बुधबार नेप्से परिसूचकमा वृद्धि देखिँदा वाणिज्य बैंक, विकास बैंक, होटल र पर्यटन र म्युचुअल फण्ड समूहको परिसूचकमा मात्रै हरियाली छाएको छ ।
वाणिज्य बैंक समूहको परिसूचक ४ दशमलव दुई तीन, विकास बैंक समूहको परिसूचक शून्य दशमलव तीन तीन, होटल र पर्यटन समूहको परिसूचक १ दशमलव नौ शून्य र म्युचुअल फण्ड समूहको परिसूचकमा शून्य दशमलव तीन छ प्रतिशतले बढ्दा वित्त र लघुवित्त समूहको परिसूचक एक प्रतिशत भन्दा धेरैले घटेको छ । बाँकी कारोबारमा आएका सबै समूहको परिसूचक एक प्रतिशत भन्दा कमले घटेको छ ।
बुधबार बढेको बजारमा कारोबार रकम पनि अघिल्लो दिनको तुलनामा ४८ करोड १४ लाख रुपैयाँले बढेको छ । दिनभर कुल ३ सय १५ कम्पनीका १ करोड ४४ लाख १९ हजार कित्ता शेयर ५ अर्ब ६८ करोड ७६ लाख रुपैयाँ बराबरमा किनबेच भएको छ । अघिल्लो दिन १ करोड ३२ लाख ४१ हजार कित्ता शेयर ५ अर्ब २० करोड ६२ लाख रुपैयाँ बराबरमा किनबेच भएको थियो । कारोबार रकमको आधारमा बुधबार नेरुडे मिरमिरे लघुवित्त वित्तीय संस्था लिमिटेडको सर्वाधिक २४ करोड ४२ लाख रुपैयाँ बराबरको शेयर किनबेच भएको छ ।
यस्तै, पोखरा फाइनान्सको पनि २१ करोड ११२ लाख रुपैयाँ बराबरको शेयर किनबेच भएको छ । बुधबार नेप्से परिसूचक र कारोबार रकमका साथै कारोबार शेयर संख्यामा समेत वृद्धि आउँदा सामुदायिक लघुवित्त वित्तीय संस्था लिमिटेड र बुद्धभूमि नेपाल हाइड्रोपावर कम्पनी लिमिटेडको शेयर मूल्य १० प्रतिशतले बढेर सर्कट लागेको छ । यता, मानुषी लघुवित्त वित्तीय संस्था लिमिटेडको शेयर मूल्य सबै भन्दा धेरै ८ दशमलव शून्य पाँच प्रतिशतले घटेको छ ।
क्याटेगोरी : अर्थ
थप समाचार
धेरै पढिएका
प्रतिक्रिया