शनिबार दिउँसो मोरङको सुन्दरहरैँचा–७ मा मृत अवस्थामा भेटिएका दुई बालिकाहरूको हत्या आमाले नै गरेको खुलेको छ । आमा अस्मिता कार्कीले नै विष खुवाएर उनीहरूको हत्या गरेको पुष्टि भएको प्रहरीको भनाइ छ । पाँच दिनअघि, स्थानीय नारायण न्यौपानेको केराबारीमा दिदीले बहिनीलाई अंगालोमा बेरेको अवस्थामा शव भेटिएको थियो ।
शव भेटिएयता बालिकाहरूकी आमा अस्मिता कार्की बेपत्ता भएकी थिइन् । तर घटनाको ५ दिनपछि झापा, बिर्तामोडको सडकमा उनी अचेत अवस्थामा फेला परेकी थिइन् ।
अस्मिताले छोरीहरूलाई विष खुवाएको स्वीकारेकी हुन् । उनले पहिले छोरीहरूलाई विष खुवाएको र त्यसपछि आफूले पनि विष सेवन गरेको बयान दिएकी छिन् । बच्चाहरूलाई विष खुवाएर हिँडेकी अस्मिता शनिबार राती जंगलमै बिताएको पनि प्रहरीसँग खुलाएकी छिन् । प्रहरीका अनुसार विष खाएपछि बालिकाहरूको मृत्यु भएपनि अस्मितालाई भने कम विषका कारण डोज नपुग्दा उनी जिवितै रहेकी हुन् । विषले छटपटाएकी अस्मिता बिर्तामोड पुगेकी थिइन् । प्रहरीका अनुसार उनले श्रीमान अर्जुन कार्कीले आफूलाई मानसिक यातना दिएको बयान दिएकी छिन् ।
दाहालले उनको शरीरमा अझै विषको असर रहेकाले कोशी अस्पतालमा उपचार गरिएको दाहालले बताए । अस्मिता कोशी अञ्चल अस्पताल विराटनगरमा उपचाररत रहेकी छिन् । उनमा मानसिक समस्या रहेको प्रहरीको प्रारम्भिक अनुसन्धानमा देखिएको छ ।
शनिबार दिउँसो एक वर्षकी आइका र तीन वर्षकी अर्पणा कार्की एकैठाउँमा मृत फेला परेका थिए । दिदी अर्पणाले बाहिनी आइकालाई अँगालो मारेको अवस्थामा शव भेटिएको थियो । मृतकहरू धनकुटा पख्रिबास नगरपालिका–४ डिकुरेका अर्जुन कार्कीका छोरीहरू हुन् ।
अर्जुन र उनकी श्रीमती अस्मिता न्यौपाने २ छोरीहरूसहित सुन्दरहरैँचा –७ मालती टोलमा बस्दै आएका थिए । हाल उनीहरू दिदी सीता रेग्मीको घरमा बसिरहेका थिए । कार्की परिवारले त्यहिँ नजिकै नयाँ घर बनाइरहेका थिए ।
कार्की दम्पत्तिबीच शनिबार घर झगडा भएको थियो । बन्दै गरेको घरमा पानी नहालेको विषयमा उनीहरूबीच झगडा भएको हो । सोहि निहुँमा २९ वर्षकी न्यौपाने घरबाट छोरीहरू लिएर निस्केकी थिइन् ।
क्याटेगोरी : समाचार
थप समाचार
धेरै पढिएका
प्रतिक्रिया