संयुक्त राष्ट्रसङ्घको न्युयोर्क मुख्यालयमा हुने सम्मेलनमा भाग लिन विश्वका नेताहरू भेला हुने क्रम तिब्र भएको छ । यो सम्मेलन गाजामा चलिरहेको युद्ध, मध्यपूर्वमा चर्किएको बढ्दो तनाव, सुडानको भोकमरी, रुस–युक्रेन द्वन्द्वजस्ता समस्या बढिरहेका बेला हुन लागेको छ ।
विगत वर्षहरूमा जस्तै चीन र रुसका नेताहरू अनुपस्थित रहनेछन् । तर बेलायतका केइर स्टार्मर, युक्रेनका भोलोदिमर जेलेन्स्की र ब्राजिलका लुइज इनासियो लुला डा सिल्भा उपस्थित हुनेछन्। इजरायलका नेता बेन्जामिन नेतान्याहू, प्यालेस्टिनी राष्ट्रपति महमुद अब्बास र इरानका नयाँ राष्ट्रपति मसुद पेजेश्कियानलगायत उपस्थित हुने भएकाले सम्मेलनलाई निक्कै चासोका साथ हेरिएको छ ।
भारतका प्रधानमन्त्री नरेन्द्र मोदीसहित विश्वका नेताहरू भविष्यमा सबैभन्दा आवश्यक मुद्दाको सामना गर्ने तरिकामा सम्झौता अपनाउन उपस्थित हुनेछन्। यद्यपी राष्ट्रसङ्घका महासचिव एन्टोनियो गुटेरेसले यो साता विश्व ‘तेस्रो विश्वयुद्धलाई पन्छाउन सक्षम हुने’ विश्वास व्यक्त गरेका छन् ।
शिखर सम्मेलनपछि राष्ट्रसङ्घका एक सय ९३ सदस्यले एक अर्कालाई सम्बोधन गर्ने उच्चस्तरीय हप्ता हुनेछ र यो ब्राजिलबाट शुरु हुनेछ । सम्भवतः गाजामा युद्धविराम वार्तालगायतका विषयमा अमेरिकी राष्ट्रपति जो बाइडेनले सम्बोधन गर्ने अपेक्षा गरिएको छ ।
क्याटेगोरी : अन्तर्राष्ट्रिय, समाचार
थप समाचार
धेरै पढिएका
प्रतिक्रिया