मकवानपुरको मनहरीमा जिप र कार एकआपसमा ठोक्किँदा एक जनाको मृत्यु, १३ जना घाइते
हेटौँडा, २७ पुस । मकवानपुरको मनहरीमा सवारी दुर्घटना हुँदा एक जनाको मृत्यु भएको छ भने १३ जना घाइते भएका छन्। शनिबार दिउँसो १ बजेको समयमा मनहरी ६ डिपार्टस्थित पूर्व पश्चिम सडकखण्डमा जिप र कार ठोक्किँदा दुर्घटना भएको हो ।
जिल्ला प्रहरी कार्यालय मकवानपुरका अनुसार दुर्घटनामा कार चालक मकवानपुर हेटौंडा उपमहानगरपालिका ४ स्कुलरोड बस्ने ६० वर्षीय सुरेन्द्रलाल श्रेष्ठको मृत्यु भएको हो।
वीरगञ्जबाट चितवनतर्फ जाँदै गरेको बागमती प्रदेश ०१ ०२६ च ५२५० नम्बरको स्कारपियो र चितवनबाट हेटौंडा तर्फ आउँदै गरेको बा १६ च ८३२४ नम्बरको कार ठक्कर खाँदा दुर्घटना भएको जिल्ला प्रहरी कार्यालय मकवानपुरले जानकारी दिएको छ ।
ईलाका प्रहरी कार्यालय मनहरीबाट प्रहरी निरीक्षक विशाल सापकोटाको कमाण्डमा ट्राफिक सहितको टोलीले दुबै सवारीको चालकसहित आठ जना घाइतेलाई उद्धार गरी उपचारको लागि चितवन पठाएको प्रवक्ता श्यामु अर्यालले जानकारी दिए ।
घाइतेको हात, खुट्टा, टाउको र आँखामा चोट लागेको छ।
क्याटेगोरी : पालिका, समाचार
थप समाचार
धेरै पढिएका
प्रतिक्रिया