बर्दियाको ठाकुरबाबा नगरपालिका– ९ मा आइतबार बाघको आक्रमणमा परी बाख्रा चराउन गएकी एक महिलाको मृत्यु भएको छ । बिहान साढे ११ बजेतिर घरनजिकै चौरमा बाख्रा चराउन गएकी स्थानीय ४५ वर्षीया पदमकला थापाको बाघको आक्रमणबाट मृत्यु भएको प्रहरीले जनाएको हो ।
ठाकुरबाबा– ७ को सुन्दरपुर गाँउनजिकै बाघले महिलालाई आक्रमण गरेको हो । बाघले आक्रमण गरी घिसार्दै लगेको महिलाको शव स्थानीय र प्रहरीले खोजतलास गर्ने क्रममा जंगलभित्र भेट्टाएका हुन । ‘आज निकै दुःखद घटना भयो । बाघले बाख्रा चराउन गएकी महिलालाई आक्रमण गर्यो । प्रहरीको सहयोग लिएर जंगलबाट उनको शव बाहिर ल्याइयो’, ठाकुरबाबाका मेयर तिलक लम्सालले भने ।
घरबाट बाख्रा चराउन गएकी पदमकलालाई बाघले जंगलबाहिरै आएर आक्रमण गरेको स्थानीय पदम खड्काले बताए । महिलालाई आक्रमण गर्ने बाघ ठाकुरबाबा– ७, सुन्दरपुरनजिक रहेको बकुवा सामुदायिक वनबाट आएको हुन सक्ने स्थानीयको अनुमान छ ।
क्याटेगोरी : समाचार
थप समाचार
धेरै पढिएका
प्रतिक्रिया