वाइडबडी घोटालामा उम्केका अधिकारीको रहस्यमय संलग्नता, अख्तियारको भूमिकामा प्रश्न
विशेष सम्वाददाता
2025 April 03
अधिकारीको संलग्नता देखाउने मोबाइल कुराकानी र सन्देशका प्रमाणहरू फेला परे
काठमाडौं । नेपाल वायुसेवा निगम (एनएसी) को वाइडबडी विमान खरिद प्रकरणमा भएको करोडौं घोटालाबारे अख्तियार दुरुपयोग अनुसन्धान आयोगले तत्काल ३२ जनाविरुद्ध भ्रष्टाचार मुद्दा दायर गरेता पनि सोही प्रकरणमा मुछिएका आशंकित अर्थ विभागका तत्कालीन निमित्त निर्देशक युवराज अधिकारी भने कुनै कानुनी कारबाहीबिना उम्किन सफल भएका थिए । अधिकारीको संलग्नता देखाउने मोबाइल कुराकानी र सन्देशका प्रमाणहरू हामीले फेला पारेका छौं ।
अख्तियारको सेटिङ र प्रभावशाली सम्बन्ध
युवराज अधिकारी वरिष्ठ अधिवक्ता सुशील पन्तका निकट मित्र मानिन्छन् । उनले त्यहाँ कानुनी सल्लाहकारका रुपमा नियुक्ति पनि दिएका छन् । पन्तले एनएसीबाट प्रति महिना दुई लाख पारिश्रमिक मात्रै लिदैं आएका छन् । स्रोतहरूका अनुसार, अख्तियार दुरुपयोग अनुसन्धान आयोगभित्र सेटिङ मिलाउन उनै पन्तले महत्वपूर्ण भूमिका खेले । यति डरलाग्दो घोटाला सम्बन्धी मुद्दा अदालतको फैसला तत्काल गर्नबाट रोक्न समेत पन्तलाई परिचालित गरिरहेको स्रोतहरु बताउँछ ।
एनएसीका कार्यकारी अध्यक्ष अधिकारी इलामका स्थायी बासिन्दा हुन् र पूर्वप्रधानमन्त्री झलनाथ खनालको सिफारिसमा उनी नियुक्ति पाएका थिए ।
स्रोतअनुसार, अधिकारीले अख्तियार आयुक्त किशोर सिलवाललाई कानुनी व्यवसायी पन्तमार्फत प्रभावमा पारेको आरोप छ । अख्तियारकै एक अधिकारीका अनुसार, अधिकारीले आर्थिक कारोबार एक महिला कर्मचारीमार्फत गराउँदै आएका थिए । जसको प्रमाण पूर्वमन्त्री प्रेम आलेले संकलन गरेका थिए । आलेले अधिकारीका मोबाइल सन्देश तथा आर्थिक लेनदेनसम्बन्धी सबै प्रमाण माधवकुमार नेपाललाई बुझाएको दाबी गरेका छन् ।
के हो वाइडबडी खरिद सम्झौता ?
२०७३ चैत २५ मा वाइडबडी खरिद सम्झौता हुँदा नेपाल वायुसेवा निगमले २४२ टन भारवहन क्षमता भएको विमान किन्नुपर्ने निर्णय गरेको थियो । तर, नेगोसिएसन टिमका सदस्यसमेत रहेका युवराज अधिकारीले २३० टन भारवहन क्षमताको विमानलाई सहमति दिए पनि भुक्तानी भने २४२ टनकै गरिएको थियो ।
यसै आधारमा, पूर्वपर्यटनमन्त्री जीवनबहादुर शाही, सचिवसहित ३२ जनाविरुद्ध एक अर्ब ४७ करोड रुपैयाँ बराबरको भ्रष्टाचार मुद्दा अख्तियारले विशेष अदालतमा दायर गरेको थियो । अदालतले चार जनालाई दोषी ठहर गरेको थियो । जसमा नेपाल वायुसेवा निगमका तत्कालीन अध्यक्ष एवं पर्यटन सचिव शंकर अधिकारी, महाप्रबन्धक सुगतरत्न कंसकार, सहसचिव बुद्धिसागर लामिछाने र शिशिर ढुंगाना रहेका छन् ।
विशेष अदालतले यसरी केही संलग्नलाई दोषी ठहर ग¥यो भने केहीलाई सफाइ दियो । तर, अख्तियारको मुद्दाबाट उम्किएका युवराज अधिकारीको संलग्नता अझै रहस्यमय रहेको त्यतिवेलाको मोबाइल सन्देश र कुराकानीले स्पष्ट पार्छ । यसबारेमा हामीसँग यथेष्ट प्रमाणहरु छन् । यो अनियमितताका बारेमा हामीले कुराकानी गर्न खोज्दा उनी सम्पर्कमै आउन चाहेनन् ।
अख्तियारको भूमिकामा प्रश्न
वाइडबडी घोटालामा धेरै प्रमाण भेटिदा पनि अख्तियारले युवराज अधिकारीलाई मुद्दाबाट किन उम्कायो ? यो प्रश्न अहिले पनि अनुत्तरित छ । सरकारले यो विषयमा छानबिन गर्ने साहस देखाउला त ?
टाट पल्टिदैं गएको नेपाल एयरलाइन्समा तत्काल व्यवस्थापकीय सुधार, आन्तरिक र वाह्य उडानमा भएका जहाजहरुलाई मर्मत सम्भार गर्ने र तुरुन्तै चालू अवस्थामा नल्याउने हो भने लामो र गौरवपूर्ण इतिहास बोकेको यो संस्था कुनै पनि बेलामा गल्र्यामगुर्लुम ढल्ने देखिन्छ ।
क्याटेगोरी : समाचार
थप समाचार
धेरै पढिएका
प्रतिक्रिया