अखिल क्रान्तिकारीमा पुरानो नेतृत्वको हस्तक्षेपः नयाँ नेतृत्व छायाँमा
अखिल नेपाल
2025 April 03
अखिल क्रान्तिकारीको नयाँ नेतृत्वलाई छायाँमा पार्दै संगठनका पूर्व अध्यक्ष हिमाल शर्मा र निवर्तमान अध्यक्ष पञ्चा सिंहले संगठनलाई पुनः पुरानै असफल यात्रातर्फ धकेल्न खोजेको आरोप लागेको छ ।
अखिल क्रान्तिकारीभित्र शुद्धीकरणका लागि उमेर हदको विषय उठेपछि संगठनभित्र ठूलो संघर्ष भयो । ३२ वर्षे उमेर हद लागू गर्ने कि नगर्ने भनेर संगठनभित्र तीव्र विवाद देखियो । सम्मेलनमै नांगो खुकुरी प्रदर्शनसमेत भएका घटनाहरूले संगठनको आन्तरिक व्यवस्थापनमा संकट देखाएको थियो ।
नयाँ नेतृत्व चयनका क्रममा माओवादी केन्द्रका उपमहासचिव शक्ति बस्नेत, पूर्व अध्यक्ष हिमाल शर्मा, रमेश मल्ल, निवर्तमान अध्यक्ष पञ्चा सिंह लगायतका नेताहरूले पार्टी हेडक्वार्टरको आडमा उम्मेदवार चयनमा हस्तक्षेप गरेर मनोनयन समेत हेरफेर गर्दा पनि उनीहरू आशातित सफलता प्राप्त गर्न असफल भए । यो पक्षबाट अध्यक्ष पदमा झिनो मतले जित हासिल भए पनि पदाधिकारीमा कमजोर उपस्थिति रहेको छ ।
तर, नयाँ नेतृत्वले स्वतन्त्र विद्यार्थी युनियनको निर्वाचनमा बलियो उपस्थिति जनाउन सफल भएको छ । तर, अध्यक्ष प्रचण्ड पक्षको पदाधिकारीमा कमजोर उपस्थिति भएपछि उपमहासचिव शक्ति बस्नेतको प्रत्यक्ष निर्देशनमा निवर्तमान अध्यक्ष पञ्चा सिंह र पूर्व अध्यक्ष हिमाल शर्माले नयाँ नेतृत्वलाई छायाँमा पारेर संगठनलाई आफ्नो प्रभावमा राख्ने प्रयास गरेको आरोप लागेको छ ।
पञ्चा सिंहको कार्यकालमा अखिल क्रान्तिकारी कमजोर बनेको थियो । सिंहसहितको नेतृत्वले स्रोत र साधनको उचित व्यवस्थापन नगर्दा संगठनले स्ववियू निर्वाचनमा सम्भावित जित्ने ठाउँमा समेत हारेको विद्यार्थी नेताहरुको भनाइ छ । ताहाचल, त्रिभुवन विश्वविद्यालय कीर्तिपुर र अन्य इञ्जिनियरिङ क्याम्पसहरूमा संगठनले जित्ने अवस्था हुँदाहुँदै झिनो मतले स्रोत, साधनको अभावका कारण हारेका त्यहाँ कार्यरत विद्यार्थी नेताहरु खुलेआम भन्दै हिंडेका छन् ।
नयाँ नेतृत्व संगठनलाई सुदृढ बनाउन अग्रसर देखिए पनि पुरानो नेतृत्वका हस्तक्षेपका कारण संगठनभित्र पुनः गुटबन्दी मौलाउने संकेत देखिएको छ ।
क्याटेगोरी : समाचार
थप समाचार
धेरै पढिएका
प्रतिक्रिया