जबजब लोकतन्त्र समाप्त पार्ने षडयन्त्र हुन्छ त्यतिबेला सञ्चारगृहमाथि आक्रमणका घटना हुने गरेका छन् : गृहमन्त्री लेखक
काठमाडौं, २२ चैत । गृहमन्त्री रमेश लेखकले लोकतन्त्र समाप्त पार्नेहरूको पहिलो निशानामा सञ्चारमाध्यम रहेको बताएका छन्। संसदको राज्य व्यवस्था समितिको बैठकमा जवाफ दिँदै गृहमन्त्री लेखकले लोकतन्त्रको अभिन्न अंग सञ्चारमाध्यम भएकाले लोकतन्त्रविरोधीहरूको पहिलो निशानामा पर्ने गरेको बताएका हुन्।
गृहमन्त्री लेखकले सरकार सञ्चारकर्मी र सञ्चारगृहको सुरक्षाका निम्ति संवेदनशील रहेको बताए। ‘सञ्चारमाध्यममाथि, सञ्चारकर्मीमाथि अवाञ्छित दबाब दिने, आक्रमण गर्ने काममा सह्यै हुने छैन, क्षम्य हुने छैन। यसको पूर्णसुरक्षाको प्रत्याभूति दिइनेछ’, उनले भने,’सरकार सञ्चारकर्मी र सञ्चारगृहको सुरक्षाका निम्ति संवेदनशील छ। हामी सञ्चारकर्मी र सञ्चारगृहको सुरक्षा गर्छौं।’
मुलुकमा जबजब लोकतन्त्र समाप्त पार्ने षडयन्त्र हुन्छ त्यतिबेला सञ्चारकर्मी र सञ्चारगृहमाथि आक्रमणका घटना हुने गरेको उनको भनाइ छ। ‘यो देशमा जबजब लोकतन्त्र समाप्त पार्ने कामहरू भएका छन्। त्यतिबेला सञ्चारकर्मीमाथि ,सञ्चारगृहमाथि आक्रमण हुने गरेको छ,’ उनले भने,’किनभने लोकतन्त्र अभिन्न अंग सञ्चारगृह हुन्।’
गृहमन्त्री लेखकले चैत्र १५ गते तीनकुनेमा राजावादीका नाममा भएको हिंस्रक आन्दोलन पनि लोकतन्त्र समाप्त पार्ने षडयन्त्र भएको दावी गरे। गृहमन्त्री लेखकले भने,’खोजीखोजी आक्रमण भएको छ। राजनीतिक दलका पार्टी कार्यालयहरूमा आक्रमण भएको छ। यी सबै कुराले पुष्टि हुन्छ कि लोकतन्त्र समाप्त पार्ने षडयन्त्र हो।’
उनले संघीय लोकतान्त्रिक गणतन्त्रात्मक शासन व्यवस्था र संविधानको रक्षा यो सरकारको पहिलो दायित्व रहेको जिकिर गरे। ‘लोकतान्त्रिक अधिकारको निर्वाधरुपमा उपभोग गर्ने विषयमा कुनै वाधा व्यवधान गर्दैनौं। गर्न चाहदैनौं। शान्तिपूर्वक भेला हुने,आफ्ना विचार राख्ने, आलोना गर्ने संविधानले नै अधिकार दिएको छ। यसको निर्वाह गर्न पाइनेछ,’उनले भने,’तर, हिंसात्मक गतिविधि गर्ने, संविधान फाल्ने गतिविधि , च्यात्ने गतिविधि यो व्यवस्थालाई नै उल्ट्याउने गतिविधि सरकारले हमेसा निष्तेज गर्नेछ।’
क्याटेगोरी : समाचार
थप समाचार
धेरै पढिएका
प्रतिक्रिया