नेपाल बार एसोसिएसनको २७औँ केन्द्रीय कार्यसमितिको निर्वाचन जारी ; ९ हजार ९९७ मतदाता, ३६ मतदान केन्द्र
काठमाडौँ, २३ चैत । । नेपाल बार एसोसिएसनको २७औँ केन्द्रीय कार्यसमितिको निर्वाचनको लागि शनिबार बिहान मतदान सुरु भएको छ । मतदाताहरूले मतदान गर्ने क्रम सुरु हुँदा उम्मेदवारहरू भने सर्वोच्च परिसरमा भोट मागिरहेका छन् ।
मतदानका लागि रामशाहपथस्थित सर्वोच्च अदालत परिसर र नेपाल बार एसोसिएसन परिसर गरी दुई ठाउँमा ३६ मतदान केन्द्र तोकिएको छ । मतदानमा सर्वोच्च, उच्च, विशेष र जिल्ला बार एसोसिएसन एवं कानुन व्यवसायीसहित ९ हजार ९९७ मतदाता सहभागी हुँदैछन् । मतदानमा सहभागी हुनका लागि अनिवार्य रूपमा कानुन व्यवसायी परिषद्बाट जारी गरिएको परिचयपत्र वा कानुन व्यवसायीको प्रमाणपत्र वा नागरिकताको प्रमाणपत्रमध्ये एक सक्कलै लिई उपस्थित हुन बार एसोसिएसनले आग्रह गरेको छ ।
३ वर्षे कार्यकालको २५ सदस्यीय ३ वर्षीय पदाधिकारीका लागि निर्वाचनमा सत्तापक्षीय नेकपा एमालेनिकट पेसागत कानुन व्यवसायी संगठन (पीपीएलए) र नेपाली कांग्रेसनिकट डेमोक्रेटिक लयर्स एसोसिएसन (डीएलए) बिच गठबन्धन भएको छ । जसलाई राजेन्द्र लिङ्देन नेतृत्वको राष्ट्रिय प्रजातन्त्र पार्टीनिकट कानुन व्यवसायीहरूले समर्थन गरेका छन् ।
सत्तापक्षीय लोकतान्त्रिक प्रगतिशील तथा देशभक्त कानुन व्यवसायी समूह नाम दिइएको उक्त समूहबाट डीएलएका प्रा.डा. विजयप्रसाद मिश्र उम्मेदवार छन् भने एमालेनिकट पीपीएलएका केदार कोइराला महासचिवका उम्मेदवार छन् ।
यस्तै यता प्रतिपक्षी समूह नेकपा माओवादी केन्द्रनिकट गणतान्त्रिक कानुन व्यवसायी संगठन (आरपीएलए) ले राष्ट्रिय स्वतन्त्र पार्टी (रास्वपा) निकट स्वतन्त्र कानुन व्यवसायी संगठन र नेकपा एकीकृत समाजवादीनिकट कानुन व्यवसायीहरूसँग मिलेर प्यानल बनाएको छ । जसमा आरपीएलएका रमनकुमार श्रेष्ठ अध्यक्षका उम्मेदवार छन् भने रास्वपानिकट कानुन व्यवसायी यज्ञमणि न्यौपाने महासचिवका उम्मेदवार छन् ।
बारको अध्यक्ष पदका लागि आशिष पौडेल, उज्वल घिमिरे र राजु कैतीले पनि उम्मेदवारी दिएका छन्
क्याटेगोरी : समाचार
थप समाचार
धेरै पढिएका
प्रतिक्रिया