कावासोतीमा बेच्न राखेको रायोको सागमा अत्याधिक विषादी, स्वास्थ्यमा गडबडी
सागमा ९९.०४० प्रतिशत कार्वमेट नामक विषादी र ९८.९६१ प्रतिशत प्रतिबन्धित अर्गानोफसफेट नामक विषादी
नवलपुर, २३ चैत । नवलपुर सदरमुकाम कावासोतीमा बेच्न राखेको रायोको सागमा अत्याधिक विषादी प्रयोग गरेको पाइएको छ । कावासोतीको हाट बजारमा बिक्रीका लागि राखिएको रायोको सागमा अत्याधिक मात्रामा विषादी प्रयोग गरेको पाइएको हो ।
विषादी परीक्षण प्रयोगशाला कावासोतीका नायब प्राविधिक सहायक विरेन्द्र भण्डारीले शनिबार बिहान परीक्षण गर्दा चितवनका कृषक ईश्वर भण्डारीले उत्पादन गरेको रायोको सागमा ९९.०४० प्रतिशत कार्वमेट नामक विषादी र ९८.९६१ प्रतिशत प्रतिबन्धित अर्गानोफसफेट नामक विषादी भेटिएको जानकारी दिए ।
त्यस्तै, मकवानपुरको पालुङका रामलाल भट्टराईले उत्पादन गरेको रायोको सागमा कार्वमेट नामक विषादी ९५.४७२ प्रतिशत र अर्गानोफसफेट नामक विषादी ७०.३६४ प्रतिशत भेटिएको र उक्त साग खान अयोग्य रहेको नायब प्राविधिक सहायक भण्डारीले बताए ।
उक्त साग जफत गरी नष्ट गरिएको प्रयोगशालाले जनाएको छ । कार्वमेट र अर्गानोफस्फेट ३५ प्रतिशतभन्दा कम हुँदा खान योग्य हुनेमा धेरै विषादी भेटिएको कावासोती नगरपालिका पशु विकास शाखा प्रमुख डा. टेकराज पौडेलले बताए ।
विषादी धेरै प्रयोग गर्ने र विषादी तरकारीमा हाले लगत्तै टिपेर बजारमा बिक्रीका लागि लैजादा समेत विषादीको अवशेष धेरै हुने उनको भनाइ छ ।
मौसमीभन्दा पनि बेमौसमी तरकारीमा विषादी बढी प्रयोग गर्ने गरिएको प्रयोगशालाले जनाएको छ ।
केन्द्रीय कृषि प्रयोगशाला हरिहर भवनका प्रमुख महेशचन्द्र आचार्यका अनुसार सरकारले २४ प्रकारका विषादी प्रयोगमा प्रतिबन्ध लगाए पनि भारतसँगको खुला सिमानाका कारण नेपाल भित्र्याएर किसानले प्रयोग गरेको पाइएको छ ।
तरकारी र फलफूलमा प्रयोग गरिएको विषादीबाट कृषक आफैँ बढी प्रभावित भएर क्यान्सर, मिर्गौलाको रोग, छालाको रोग, नपुंसकता लगायत विभिन्न समस्या देखिने कार्यालय प्रमुख आचार्यको भनाइ छ । त्यसैले विषादी प्रयोग गर्न परेको अवस्थामा सही समय, सहि परिमाण, सहि तरिका र सहि विषादी छनोट गरी प्रयोग गर्न उनको सुझाव छ ।
क्याटेगोरी : पालिका, समाचार, स्वास्थ्य
थप समाचार
धेरै पढिएका
प्रतिक्रिया