यससँगै कोशीमा मुख्यमन्त्रीसहित १० सदस्यीय मन्त्रिपरिषद् बनेको छ। कोसी प्रदेशका नवनियुक्त पाँच मन्त्री र दुई राज्यमन्त्रीले पद तथा गोपनियताको शपथ लिए। प्रदेश प्रमुखको कार्यालयमा नवनियुक्त मन्त्रीहरूलाई प्रदेश प्रमुख परशुराम खापुङ र नवनियुक्त राज्यमन्त्रीहरूलाई मुख्यमन्त्री कार्कीले शपथ ग्रहण गराए।
मुख्यमन्त्री कार्कीले एमालेका लीलावल्लभ अधिकारी, एकराज कार्की र पाँचकर्ण राईलाई मन्त्री बनाए भने एमालेकै सिर्जना राईलाई राज्यमन्त्री नियुक्त गरेका छन्। त्यस्तै नेकपा (माओवादी केन्द्र) का राजेन्द्रकुमार कार्की र नारायण बुर्जा मगर मन्त्री बन्दा बन्दना झाँगड राज्यमन्त्री बनेका छन्।
मन्त्रिपरिषद् विस्तारपछि सञ्चारकर्मीसँग बोल्दै मुख्यमन्त्री कार्कीले अब प्रदेश सरकारले सुशासन र वार्षिक नीति–कार्यक्रमलाई प्राथमिकतामा राखेर काम गर्ने दाबी गरे।
गत वैशाख २७ गते मुख्यमन्त्रीमा नियुक्त भएका कार्कीले विस्तार गरेको मन्त्रिमण्डलअनुसार आर्थिक मामिला तथा योजना मन्त्रालयमा रामबहादुर मगर, भौतिक पूर्वाधार विकास मन्त्रालय गणेश उप्रेती, आन्तरिक मामिला तथा कानुन मन्त्रालयमा लिलावल्लभ अधिकारी, स्वास्थ्य मन्त्रालयमा राजेन्द्र कार्की छन् । त्यसैगरी खानेपानी, सिंचाई तथा ऊर्जा मन्त्रालयमा एकराज कार्की, सामाजिक विकास मन्त्रालयमा पाँचकर्ण राई, उद्योग, कृषि तथा सहकारी मन्त्रालयमा मुख्यमन्त्री आफैँ र पर्यटन, वन तथा वातावरण मन्त्रालयमा नारायण बुर्जा मगर मन्त्री नियुक्त भएका छन्।
दुई राज्यमन्त्रीहरू सिर्जना राई मुख्यमन्त्री कार्यालय र बन्दना झाँगडलाई पर्यटन, वन तथा वातावरण मन्त्रालयको जिम्मेवारी दिइएको हो। यही मन्त्रिपरिषदलाई लिएर अहिलेको सरकार आगामी निर्वाचनसम्म चल्ने मुख्यमन्त्री कार्कीको दाबी छ।
संविधानको धारा १६८ (५) अनुसार अघिल्लो हप्ताको बिहीबार मुख्यमन्त्रीमा नियुक्त भएका कार्कीले उपधारा ४ अनुसार वैशाख ३१ गते विश्वासको मत लिएका थिए।
समयबद्ध सम्वाददाता
2024 May 17
प्रतिक्रिया