गृहमन्त्रीले झुट बोलेको भन्दै गगन थापाले प्रस्तुत गरे यी तथ्य
समयबद्ध सम्वाददाता
2024 May 19
नेपाली कांग्रेसका महामन्त्री गगन थापाले उपप्रधान एवं गृहमन्त्री रवि लामिछानेले ग्यालेक्सी टीभीको प्रबन्ध निर्देशक (एमडी) हुँदा ऋण लिने कुनै निर्णय नगरेको भन्ने तथ्यमा गम्भीर प्रश्न उठाएका छन् । थापाले १५ प्रतिशत सेयर होल्डर र प्रबन्ध निर्देशक भएका लामिछानेले भनेजस्तो निर्णय नै नगरी रातारात पैसा आउने परिकल्पना उनीबाहेक कसैले गर्न नसक्ने बताए ।
“उहाँ (रवि लामिछाने)ले बोल्दा (संसद् बैठकमा) म ध्यान दिएर सुनिरहेको थिएँ । गोरखा मिडिया नेटवर्कले चलाएको ग्यालेक्सी टीभीमा एमडी हुँदा कुनै निर्णय नगरेको भन्नुभयो । तपाईंहरू पनि कतिपयले कम्पनी चलाउनुभएको होला, एमडीले निर्णय नै नगरी रातारात पैसा आउँछ ?,” प्रश्न गर्दै लामिछानेले भने, “उहाँले टेलिभिजनको अडिट रिपोर्टमा पटक–पटक ऋण लिएको भनेर सिग्नेचर गर्नुभएको छ ।”
आइतबार नयाँ बानेश्वारमा पत्रकार सम्मेलन गर्दै थापाले त्यसबाहेक लामिछानेले आफूविरुद्ध उजुरी नभएको र कतै अभियोजन पनि नगरिएको भनेर अर्को झुट बोलेको बताए । थापाले लामिछानेले आफूले मात्र झुट नबोलेर प्रहरी महानिरीक्षकलाई पनि झुट बोल्न लगाएको जिकिर गरे ।
“उहाँविरुद्ध पोखरामा पूरक उजुरी परेको छ । त्यसमा सीआईबीले छानबिन गरेको छ । सुप्रिम, सूर्यदर्शन, स्वर्णलक्ष्मी प्रत्येकमा उहाँको नाम छ । सुप्रिमको अभियोजन हुँदा उहाँको नामसहित अभियोजन छ । तर, विपक्षी मात्र बनाइएको छैन,” थापाले भने, “उहाँ गृहमन्त्री भएपछि सीआईबीले बैक खाताको कारोबार हेर्छु भनेको छ, त्यसलाई रोकिएको छ । छानबिन भइरहेका विषय उहाँ गृहमन्त्री भएपछि रोकेर अनुसन्धान गर्ने निकाय बचाउमा उत्रिनुपरेको छ ।”
महामन्त्री थापाले राष्ट्रिय स्वतन्त्र पार्टी (रास्वपा)का सभापति समेत रहेका लामिछाने मात्र नभएर उक्त पार्टीका अरू व्यक्ति पनि सहकारीको बचत अपचलनमा संलग्न रहेको आरोप लगाए । उनले सुप्रिम, सूर्यदर्शन, स्वर्णलक्ष्मी सहकारी संस्थामा संलग्न देखिएका व्यक्तिहरू हाम्रो कृषि सहकारीको काण्डमा पनि विवादमा तानिएको बताए । उनले संगठित ठगीको आशंका देखिएको भन्दै ती विषयमा विस्तृत अनुसन्धानले वास्तविकता उजागर हुने उल्लेख गरे ।
क्याटेगोरी : राजनीति
थप समाचार
धेरै पढिएका
प्रतिक्रिया