तालिकाअनुसार एमबिबिएस पढाइ सञ्चालन होस् : प्रधानमन्त्री
समयबद्ध
2024 June 05
प्रधानमन्त्री पुष्पकमल दाहाल ‘प्रचण्ड’ ले पोखरा स्वास्थ्य विज्ञान प्रतिष्ठानलाई कार्यतालिकासहित एमबिबिएसको पढाइ अघि बढाउन निर्देशन दिएका छन् ।
प्रतिष्ठानको बुधबार भएको सातौँ सभालाई सम्बोधन गर्दै प्रधानमन्त्री प्रचण्डले आगामी आर्थिक वर्षदेखि एमबिबिएस तहमा अध्यापन गराउन योजनावद्ध काम गर्न अनुरोध गरे । व्यवस्थित रुपमा पोखरा स्वास्थ्य विज्ञान प्रतिष्ठानको मेडिकल कलेज सञ्चालनमा आएपछि प्रतिष्ठान चिकित्सा शिक्षाका उल्लेख्य उपलब्धि हाँसिल हुने उनकाे अपेक्षा छ ।
प्रधानमन्त्री प्रचण्डले भने, “चिकित्सा शिक्षाको स्नातकोत्तर तह सञ्चालनमा आएपछि यस प्रतिष्ठान चिकित्सा शिक्षाका लागि मुलुककै सबल र भरपर्दो संस्थाका रूपमा विकास हुने सरकारको अपेक्षा छ ।” भरपर्दो र गुणस्तरीय स्वास्थ्य सेवा र समग्र देशका लागि दक्ष चिकित्सक उत्पादनमा प्रतिष्ठानले अनुकरणीय भूमिका निर्वाह गर्ने विश्वास उनले व्यक्त गरे ।
प्रधानमन्त्री दाहालले प्रतिष्ठानको विकास, विस्तार र उनन्नयनलाई सरकारले प्राथमिकतामा राखेको बताए । उनले अर्थतन्त्रमा आएको दबाब र स्रोत विनियोजनमा आएको कठिनाइका बाबजुद स्वास्थ्य क्षेत्रलाई ध्यान दिइएको उल्लेख गरे ।
पोखरेलीको गौरव यस प्रतिष्ठानलाई सफल पार्न सबैको सहयोगको अपेक्षा उनले गरे । प्रतिष्ठान चिकित्सा शिक्षामा समग्र देशका लागि उदाहरणीय शैक्षिक संस्थाका रूपमा स्थापित हुने विश्वास व्यक्त गरे । पोखरा स्वास्थ्य विज्ञान प्रतिष्ठानको गण्डकी क्षेत्रीय अस्पताल यो क्षेत्रकै ठूलो अस्पताल मानिन्छ ।
क्याटेगोरी : राजनीति
थप समाचार
धेरै पढिएका
प्रतिक्रिया