रवि लामिछानेसँग बयान लिन प्रहरीले सुरु गर्यो

काठमाडौं – प्रहरीले राष्ट्रिय स्वतन्त्र पार्टी (रास्वपा) का सभापती र पूर्व गृहमन्त्री रवि लामिछानेसँग बयान लिन थालेको छ। जिल्ला प्रहरी कार्यालय कास्कीका अनुसन्धान अधिकृत र सरकारी वकिलले लामिछानेसँग बयान लिने प्रक्रिया अघि बढाएका हुन्। लामिछानेलाई गएको शुक्रवार पार्टीको मुख्यालय वनस्थलीबाट पक्राउ गरेर पोखरा लगिएको थियो।

कास्की जिल्ला अदालतले लामिछानेलाई छ दिन हिरासतमा राखेर अनुसन्धान गर्न अनुमति दिएको छ। उनीविरुद्ध सूर्यदर्शन सहकारीका संस्थापक अध्यक्ष गितेन्द्रबावु (जीवी) राईसँग मिलेर सहकारीको रकम अपचलन गरेको आरोप छ। यसैक्रममा, पूर्व डीआईजी छविलाल जोशीलाई पनि असोज ६ गते पक्राउ गरिएको थियो। जोशीलाई आज जिल्ला प्रहरी कार्यालय कास्कीले रुपन्देही पठाएको छ।

सूर्यदर्शन सहकारीसँगै बुटवलमा रहेको सुप्रिम सहकारी ठगी प्रकरणमासमेत अनुसन्धान गर्नुपर्ने भएकाले जोशीलाई रुपन्देही पठाइएको जनाइएको छ। रुपन्देहीमा बयान पूरा भएपछि उनलाई पर्सि बुधबार पोखरा फर्काइने प्रहरीले जनाएको छ।

यसैबीच, रास्वपाका नेता कार्यकर्ताहरूले सभापती लामिछानेको पक्राउको विरोधमा आज पोखरा लगायतका विभिन्न स्थानमा प्रदर्शन गरिरहेका छन्। उनका समर्थकहरूले तत्कालीन सरकार र सुरक्षा निकायको आलोचना गर्दै लामिछानेको रिहाइको माग गरेका छन्।