पूर्व राष्ट्रपति विद्यादेवी भण्डारी एमालेको सक्रिय राजनीतिमा फर्कने तयारीमा लागिरहेकै बेलामा उपराष्ट्रपति नन्दकिशोर पुन ‘पासाङ’ पनि माओवादी केन्द्रको राजनीतिमा महत्त्वपूर्ण भूमिकामा आउन लागेका छन् । विशेषगरी रोल्पा, रूकुम क्षेत्रको राजनीतिक सन्तुलनका लागि अध्यक्ष पुष्पकमल दाहाल ‘प्रचण्ड’ स्वयंले पासाङलाई उपाध्यक्षको भूमिकामा ल्याउन जोड दिएकाे खुमलटार निकट स्राेतले जानकारी दिएकाे छ । जनयुद्धका बेला लोकप्रिय नेताको रूपमा स्थापित भएका पासाङले रोल्पामा नेतृत्वको खडेरी पूर्ति गर्न महत्वपूर्ण भूमिका खेल्ने अनुमान एकथरिले गरेका छन् । राष्ट्रपति र उपराष्ट्रपति बन्दा पार्टीको भूमिकाबाट विदा लिनुपर्ने प्रावधान छ । यसअघिका राष्ट्रपति र उपराष्ट्रपति पनि सक्रिय राजनीतिमा फर्केका छैनन् ।
राजनीतिक परिदृश्य र पासाङको योगदान
रोल्पा र रुकुमका संघर्षशील भूमिगत कालखण्डमा योगदान गरेका नेताहरू एकपछि अर्काे विवादमा तानिएका छन् । उपाध्यक्ष कृष्णबहादुर महरा विभिन्न विवादमा तानिएका कारण सक्रिय हुन नसक्ने अवस्थामा छन् भने प्रभावशाली नेता नेत्रविक्रम चन्द ‘विप्लव’ले माओवादी केन्द्रलाई छोडेर छुट्टै पार्टी गठन गरेका छन् । माओवादी केन्द्रसँग एकता गरे पनि पार्टी अध्यक्ष प्रचण्ड र उनी निकट व्यक्तिको विश्वास जित्न सजिलाे छैन । उपमहासचिव वर्षमान पुन पनि कतिपय विवादित आर्थिक प्रकरणमा जाेडिएका र स्वास्थ्यकै समस्याका कारण पनि राजनीतिक सक्रियतामा अवरोध भएको छ । यस अवस्थाको मध्यनजर गर्दै माओवादी केन्द्रकाे नेतृत्वले रोल्पामा पासाङको सशक्त भूमिकाको खोजी गरेको देखिन्छ । रूकुमका स्थापित नेता जनार्दन शर्मासँग टक्कर दिनका लागि पनि पासाङकाे आवश्यकताबाेध गरिएकाे हुनसक्छ ।
पासाङको छवि र विवादित सम्पत्ति
हालसालै पासाङको छवि केही विवादमा तानिएको छ । उनको काठमाडौंस्थित घरजग्गाको स्रोतप्रति प्रश्न उठाउँदै नेकपा बहुमत पक्षले उनको घर कम्पाउण्डमा पोस्टर टाँसेका थिए । यस घटनाले पासाङको सम्पत्ति विवादमा पारिएको छ । यसबाहेक, उनका दुवै छोराहरू सहकारी र सुन प्रकरणमा तानिएकाले उनको व्यक्तिगत छवि र पारिवारिक प्रतिष्ठामा असर परेको छ ।
सुविधाको विषयमा भण्डारी र पासाङबीचको भिन्नता
पूर्व राष्ट्रपति भण्डारीले सक्रिय राजनीतिमा आउँदै गर्दा राज्यबाट कुनै सुविधा लिएकी छैनन् । तर, पासाङले भने सरकारी सुविधा लिइरहेको समाचार बाहिर आएको छ । यसले उनीप्रति प्रश्नचिन्ह खडा गरेको छ । राज्यबाट सुविधा लिएर सक्रिय राजनीतिक भूमिकामा आउन लागेका पासाङको यो निर्णयले पार्टीभित्रै विभिन्न प्रतिक्रिया उत्पन्न गराएको छ ।
माओवादी केन्द्रका लागि पासाङको भविष्य
पासाङको भूमिकालाई प्रचण्डले महत्वपूर्ण मान्दै आए पनि उनका वरपर उठेका विवादहरूले माओवादी केन्द्रभित्रै थप चुनौती खडा गरेको छ । पासाङको इमानदारी र सोझोपनको छवि राजनीतिक यात्रा सुरु गर्दा उनको बलियो पक्ष थियो तर सम्पत्तिको विवाद र परिवारका सदस्यहरूको काण्डले उनको विश्वसनीयतामा आँच पुर्याएको छ । अब पासाङले आफ्नो छवि सुधार गर्दै प्रचण्डको अपेक्षामा खरो उत्रनु पर्ने चुनौती सामना गर्नुपर्नेछ ।
रोल्पामा स्थायित्व कायम गर्न पासाङलाई उपाध्यक्ष बनाउने निर्णयले माओवादी केन्द्रको शक्ति सन्तुलनमा के कस्तो प्रभाव पार्ला, यो हेर्न बाँकी नै छ ।
क्याटेगोरी : राजनीति
धेरै पढिएका
प्रतिक्रिया