अहिले नै केपी ओलीसँग जुध्ने हो भने त समस्या आइहाल्छ, बेला भएको छैन : लेखराज भट्ट
काठमाडौं, १ माघ । नेकपा (एमाले) का सचिव तथा सुदूरपश्चिम इञ्चार्ज लेखराज भट्टको एउटा भिडियो सामाजिक सञ्जालमा बाहिरिएको छ । उक्त भिडियोमा नेता भट्टले एमाले अध्यक्ष केपी शर्मा ओलीबाटै आफू हेपिएको बताएका छन् ।
‘हामी मञ्चमा हुन्छौँ, कहिले अध्यक्ष (ओली) आतंककारी भनिदिनुहुन्छ हामीलाई,’ उनले भिडियोमा भनेका छन्, ‘अपराधी, हत्यारा भनिदिनुहुन्छ । तर हामी अहिले पनि गर्व गर्छौं क्या । जनयुद्ध नभएको भए आज केपी शर्मा ओलीले पनि त्यसरी बोल्न सक्नु हुन्थेन । त्यो पाउनु हुन्थेन ।’
भट्टले माओवादी केन्द्रका अध्यक्ष पुष्पकमल दाहाल प्रचण्डसँग लडे जस्तै ओलीसँग जुध्न नसकिने पनि बताएका छन् । ‘मचाहिँ के हो त भन्दा म प्रचण्डसँग जुधेको जस्तो अहिले केपीसँग जुध्न सक्दिनँ,’ उनले भनेका छन्, ‘किनभने त्यहाँ लडेर आइया छ । यहाँ केपी भनिएको छ । हाम्रो (एमालेमा) त म भन्ने छ नि त अहङ्कार नेताहरूमा । या त मैले अन्य पार्टी खोल्नुपर्छ । या त अरू पार्टीमा जानुपर्छ । या त मैले सन्न्यास लिनुपर्छ । सिधै अहिले नै केपीसँग जुध्ने हो भने त समस्या त आइहाल्छ । अहिले बेलै भएको छैन । भर्खर हामी आएका हौँ । उहाँले हामीलाई बुझ्नुभएको छैन ।’
सामाजिक सञ्जालमा भाइरल उक्त भिडियो कैलालीको अत्तरियास्थित भट्ट निवासमा एमालेमा रहेका पूर्वमाओवादी नेता तथा कार्यकर्ताहरूसँगको कुराकानीको रहेको बताइएको छ । केही दिनअघि भट्टले एमाले छोडेको सामाजिक सञ्जालमा चर्चा भएको थियो । भट्टको सचिवालयले त्यसको खण्डन गरेको थियो । त्यसअघि भट्टकै गृहनगर गोदावरीका ४६ जना पूर्वमाओवादीले एमाले छोडेको विज्ञप्ति सार्वजनिक भएको थियो । केही दिनपछि ४६ मध्येका २८ जनाले अफूहरू एमालेमै रहेको भन्दै विज्ञप्ति जारी गरेका थिए ।
क्याटेगोरी : राजनीति
थप समाचार
धेरै पढिएका
प्रतिक्रिया