काठमाडौं, १९ चैत । राष्ट्रिय प्रजातन्त्र पार्टी (राप्रपा) का वरिष्ठ नेता एवं पूर्वमन्त्री सांसद दीपक बोहराको निधन भएको छ ।
बोहराको उपचारको क्रममा काठमाडौंको ओम अस्पतालमा निधन भएको उनका स्वकिय सचिव तारामणि चन्दले जानकारी दिए । उनी रुपन्देही क्षेत्र नम्बर ३ बाट निर्वाचित सांसद हुन् ।
उनको घाँटीमा क्यान्सर भएको थियो । उनी चुनावको बेलामा पनि बोल्न नसक्ने अवस्थामा थिए । नबोलेरै उनी निर्वाचित भएका थिए । संसदमा पनि उनले बोलेनन् ।
पञ्चायतकालमै राज्य र सहायकसहित ५ पटक मन्त्री बनेका उनी गणतन्त्रमा पनि कुल ४ पटक मन्त्री बनेका थिए । उनी २०३८ सालमा पर्यटन राज्यमन्त्री बने, सोही वर्ष पर्यटन सहायकमन्त्री बनेका थिए । यसैगरी २०४० सालमा पर्यटन राज्यमन्त्री, २०४३ सालमा निर्माण तथा यातायात राज्यमन्त्री तथा २०४४ सालमा निर्माण तथा यातायातमन्त्री बनेका थिए ।
यस्तै उनी गणतन्त्रपछि २०६७ सालमा बन तथा भूसंरक्षण मन्त्री बने भने केपी ओली नेतृत्वको सरकारका पालामा २०७२ सालमा श्रम तथा रोजगार मन्त्री, २०७३ मा प्रचण्ड प्रधानमन्त्री हुँदा आपूर्तिमन्त्री र शेरबहादुर देउवा नेतृत्वको सरकारमा २०७४ मा स्वास्थ्यमन्त्री बनेका थिए । यस हिसाबले उनी कुल ९ पटक मन्त्री बनेका थिए । २००७ चैत मा जन्मिएका उनी हाल राष्ट्रिय प्रजातन्त्र पार्टीका वरिष्ठ नेता थिए । २०७९ को प्रतिनिधिसभा निर्वाचनमा बोहराले तत्कालीन गृहमन्त्री नेपाली कांग्रेसका नेता बालकृष्ण खाँणलाई पराजित गरेका थिए ।
बोहरा नेपालको राजनीतिमा ४ दशकदेखि राप्रपामा क्रियाशील रहँदै आएका थिए । २०३६ सालमा रुपन्देहीबाट राष्ट्रिय पञ्चायत सदस्यमा निर्वाचित उनी २०४२ सालको राष्ट्रिय पञ्चायत सदस्यमा समेत विजयी भएका थिए । उनी २०७० सालमा पनि रुपन्देही निर्वाचन क्षेत्र नम्बर २ बाट संविधानसभा सदस्यमा निर्वाचित भएका थिए ।
त्यसअघि बोहरा २०६४ सालको संविधानसभा चुनावमा भने रुपन्देही–१ मा माओवादी केन्द्रका घनश्याम यादवसँग पराजित भएका थिए। यस्तै २०७० को संविधानसभा निर्वाचनमा भने तत्कालीन क्षेत्र नम्बर २ बाट कांग्रेसका रामकृष्ण ताम्राकारलाई पराजित गर्दै विजयी भएका थिए । यस्तै प्रतिनिधि सभा निर्वाचन, २०७४ मा उनी नेकपा एमालेका घनश्याम भुसालसँग पराजित भएका थिए । स्वास्थ्यमा समस्या भएकै कारण उनी राप्रपाको राजनीतिमा खासै सक्रियता दिएनन् ।
क्याटेगोरी : राजनीति
थप समाचार
धेरै पढिएका
प्रतिक्रिया