राप्रपा नेता बोहराको आज अन्त्यष्टी गरिने, नबोलेरै चुनाव जिते, बोल्नै नपाई अस्ताए !
काठमाडौं । रुपन्देही क्षेत्र नम्बर-३ बाट निर्वाचित प्रतिनिधिसभा सांसद दीपक बोहराको आज अन्त्यष्टी गरिदैछ ।
राष्ट्रिय प्रजातन्त्र पार्टी (राप्रपा) का वरिष्ठ नेता एवं पूर्वमन्त्री बोहराको उपचारका क्रममा काठमाडौँको ओम अस्पतालमा हिजो मंगलबार निधन भएको हो। प्रतिनिधि सभाले हिजै सांसद दिपक बोहराप्रति श्रद्धाञ्जली व्यक्त गर्दै शोक प्रस्ताव पारित गरेको छ ।
महामारीमा कोरोना संक्रमित भएका उनी त्यस यता बोल्न नसक्ने अवस्थामा थिए। उनले निर्वाचनको बेला पनि नबोलेरै चुनाव जितेका थिए । उनले यो कार्यकालमा संसदमा एकचोटी पनि नबोलेर अस्ताएका छन् । पोष्ट कोभिडको समस्याले घाँटीमा देखिएको असर थपिएपछि उनी केही समयपछि अमेरिकाको न्यूयोर्क पुगेका थिए। त्यसयता उनी स्पीच थेरापी गर्दै आएका थिए।
बोहरालाई नेपालको राजनीतिमा निकै प्रभावशाली व्यक्तिको रुपमा लिन सकिन्छ । पञ्चायकालदेखि गणतन्त्रसम्म उनी पटकरपटक मन्त्री बने ।
२०७९ को निर्वाचनमा बहालवाला गृहमन्त्री बालकृष्ण खाँडलाई पराजय गराएर बोहराले जित हासिल गरेका थिए । खाँडलाई माओवादी, एकीकृत समाजवादीलगायत पाँच दलीय गठबन्धनको समर्थन थियो भने बोहरालाई एमालेको समर्थन थियो।
निर्वाचनका समयमा उनले चिकित्सककै सल्लाहमा नबोलेरै घरदैलो कार्यक्रम गरेका थिए । आमसभाहरूमा समेत बोहरा सहभागी हुन्थे तर, भाषण गर्दैनथे ।
३१ वर्षको उमेरमै मन्त्री बनेर सरकारमा पुगेका बोहरा २०४० सालमा पर्यटन राज्यमन्त्री, २०४३ सालमा निर्माण तथा यातायात मन्त्रालयको राज्यमन्त्री, २०४४ सालमा सोही मन्त्रालयकै मन्त्री हुन सफल भएका थिए । गणतन्त्र आएपछि समेत बोहरा चार पटक मन्त्री बने । २०६७ मा वन तथा भूसंरक्षण मन्त्री बनेका बोहरा २०७२ मा श्रम तथा रोजगार मन्त्री, २०७३ सालमा आपूर्ति मन्त्री र २०७४ मा स्वास्थ्य मन्त्री बनेका थिए ।
बोहराको पार्थिव शरीरको बुधबार काठमाडौँस्थित पशुपति आर्यघाटमा दाहसंस्कार गरिने जनाइएको छ ।
पारिवारिक स्रोतले जानकारी दिए अनुसार बोहराको पार्थिव शरीर रुपन्देहीको दिपनगरबाट आजै हेलिकोप्टरबाट काठमाडौँ ल्याएनेछ ।
बोहराका दुई श्रीमती मञ्जु बोहरा र उन्नति शिला बोहरा रहेका छन् । उनका दुई छोरा गौरव र प्रज्वल रहेका छन् ।
क्याटेगोरी : राजनीति
थप समाचार
धेरै पढिएका
प्रतिक्रिया