काठमाडौं । श्रम, रोजगार तथा सामाजिक सुरक्षा मन्त्री शरतसिंह भण्डारीको हदैसम्मको नैतिक पतन देखिने हर्कत हालै सार्वजनिक भएको छ । वहालवाला मन्त्रीको यस्तो हर्कत सार्वजनिक हुँदासमेत उनले अझैसम्म राजीनामा दिएका छैनन् ।
मन्त्री शरदसिंह भण्डारीले मन्त्रालयको लेटरहेडमा कन्सुलर सेवा विभाग त्रिपुरेश्वरलाई भिसा सिफारिस गरिदिन भन्दै लेखेको पत्रमा पूर्वसांसद निर्जला राउतलाई पत्नी उल्लेख गरिएको तथ्यसहितको समाचार हिजै जनआस्थाले सार्वजनिक गरेको थियो ।
घरमा श्रीमती हुँदाहुँदै अर्की श्रीमती विवाह गर्न कानुनी रुपमा बन्देज छ । मन्त्रीजस्तो व्यक्तिले गैरकानुनी काम गरेको सार्वजनिक भइसक्दा पनि अझै मन्त्री पदमा बसिरहनुलाई कुन नैतिकताले दिइरहेको होला ? आज नागरिक तहबाट प्रश्न उठिरहेको छ ।
मन्त्री भण्डारीको आफ्नी पत्नी रश्मी सिंह भण्डारीसँग सम्बन्धविच्छेद भएको कुनै प्रमाण छैन तर उनले पूर्व सांसद राउतसँग विवाह भएको विवाह दर्ता प्रमाणपत्र निकालेको समाचारमा उल्लेख छ । उनले महोत्तरीमा गोप्य रुपमा विवाह गरेको भए त्यो विवाह गैरकानुनी ठहरिन्छ । किनभने एउटा श्रीमती हुँदाहुँदै ऊसँग सम्बन्ध विच्छेद नगरी अर्कौ श्रीमतीसँग विवाह दर्ता हुन सक्दैन ।
उनीहरुबीचको सम्बन्धको बारेमा पहिलेदेखि नै चर्चा चल्नै गरेको थियो । तर भण्डारी र राउतले आफूहरुको सम्बन्धको बारेमा अस्वीकार गर्दै आएका थिए ।
नैतिक पतन देखिने र प्रचलित कानुनले बन्देज गरेको कार्य गरेको तथ्य सार्वजनिक भएसँगै मन्त्री भण्डारी पदमा रहन अयोग्य भइसकेका छन् । तर उनले राजीनामा दिने कुनै छाँट देखाएका छैनन् । यतिठूलो विषय सार्वजनिक भइसकेपछि प्रधानमन्त्रीले आफ्नो मन्त्रीलाई बर्खास्त गर्न सक्छन् ।
प्रधानमन्त्री केपी शर्मा ओली अहिले बिमस्टेकको छैटौं शिखर सम्मेलनका भाग लिन थाइल्यान्डको बैंककमा छन् । उनले नैतिक प्रश्न उठेका मन्त्रीलाई फेनबाटै पनि राजीनामा माग्न सक्थे तर यसमा चासो नदिनुको कारणले जनताले प्रधानमन्त्रीमाथि नै प्रश्न गरिरहेका छन् ।
क्याटेगोरी : राजनीति
थप समाचार
धेरै पढिएका
प्रतिक्रिया