महिला त्रिकोणात्मक अन्तर्राष्ट्रिय टी–२० सिरिज : नेपाल नेदरल्यान्ड्ससँग २० रनले पराजित
काठमाडौँ, १७ माघ । महिला त्रिकोणात्मक अन्तर्राष्ट्रिय टी–२० सिरिजको पहिलो खेलमा नेपाल नेदरल्यान्ड्ससँग २० रनले पराजित भएको छ ।
कीर्तिपुरस्थित त्रिवि मैदानमा बिहीबार रोमाञ्चक खेलमा जितका लगि एक सय ५८ रनको चुनौतीपूर्ण लक्ष्य पछ्याएको नेपाल निर्धारित २० ओभरमा सात विकेटको क्षतिमा एक सय ३७ रनमा समेटियो ।
नेपालका लागि ओपनर सीता रानामगरले सर्वाधिक २८ रन बनाइन्। यस्तै कविता जोशीले २७, पुजा महतोले २४ र रुविना क्षेत्रील ११ रन बनाए । अन्य खेलाडीले दोहोरो अङ्कमा रन बनाउन सकेनन् ।
बलिङमा नेदरल्यान्ड्सका इभा लेन्च र क्यारोलिन डे लन्जले दुई दुई तथा आईरिस जेविलिङ र फेडेरिक ओभरडिजले एक एक विकेट लिए यसअघि टस हारेर पहिले ब्याटिङको निम्तो पाएको नेदरल्यान्ड्सले निर्धारित २० ओभरमा चार विकेटको क्षतिमा एक सय ५७ रन बनाएको थियो ।
नेदरल्यान्ड्सका लागि रोविने रिज्केले अविजित अर्धशतकीय इनिङ्स खेलिन् । उनले ४८ बलमा आठ चौकाको सहयोगमा ५९ रन बनाइन् । यस्तै आईरिस जेविलिङले अविजित ३१ तथा स्टेरे केलिसले २९ र हिदर सिगर्सले २३ रन बनाए ।
बलिङमा नेपालका सीता रानामगर, इश्वरी विष्ट, पुजा महतो र कविता कुँवरले एक एक विकेट लिए । नेपालका लागि अलिशाकुमारी यादव तथा मनिषाकुमारी उपाध्यायको राष्ट्रिय टोलीमा डेब्यू गरेका छन् ।
सिरिजमा नेपाल, नेदरल्यान्ड्स र थाइल्यान्डसम्मिलित छ । नेपालले दोस्रो खेल माघ १९ गते थाइल्यान्डसँग खेल्नेछ ।
क्याटेगोरी : खेलकुद
थप समाचार
धेरै पढिएका
प्रतिक्रिया